سفارش تبلیغ
صبا ویژن

یا حسین دئییر! / شعر میرجلال «خان آراز» نخجوانی

شعر عاشورائی آذربایجان

 

یا حسین!

مرحوم میرجلال نخجوانی (1950 – 2008)

 

گلیب یوردوموزا ماه محرم

اوزنده غم، کدر، بطنینده ماتم

سیزلایان قلب لرین روحونا همدم

هیچقیران دوداقلار یا حسین دئییر.

 

آغلاییر ایلک بهار عشوه ناز ایله

نیسگیللی ائللریم غملی ساز ایله

خفیف کولکلرین بم آواز ایله

تیتره ین یارپاقلار یا حسین دئییر!

 

یاشیل سؤیودلره قونوب توراجلار

اوزاق کربلادان گلن او آجلار

باشینی آشاغی سالیب آغاجلار

اَییلن بوداقلار یا حسین دئییر.

 

گؤیلر ده گؤینه ییر بو ائل یاسیندا

باغچالار بوزوشوب غم لباسیندا

داغلار دا قورویوب داش عباسیندا

چاغلایان بولاقلار یا حسین دئییر!

 

بو گون سوزمه ییندن قالیر دورنالار

بو گون اوزمه ییندن اولور سونالار

سولانمیش گؤزلری سیلیر آنالار

اورپه نن یاناقلار یا حسین دئییر

 

امام عاشیقلری شبیه قورورلار

شاخسئی جرگه سینده سینه وورورلار

ننه لر، بابالار غم قوورلار

بالاجا اوشاقلار یا حسین دئییر

 

واخسئی صدالاری عرشه اوجالیر

حق سسی گؤیلردن سانکی باج آلیر

اون یئتمز قولـله لر بیر آن آلچالیر

یئلله نن بایراقلار یا حسین دئییر!

 

یئتیر مقامینا بیر مُدهش زمان

آمانسیز صحرادا شام غریبان

فلکلر ایسته ییر مسلکه قوربان

سوورولان قوملاقلار یا حسین دئییر

 

وئردی قرارینی ابلیس خلیفه

یازیلدی تاریخه قانلی صحیفه

اسلامدا اوجالدی شانلی بیر ذیروه

یاخینلار اوزاقلار یا حسین دئییر

 

ائشیتسین بو گونون بشر اولادی

چاغداش خیمه لردن قوپان فریادی

عدالت، حقیقت، انسان، هاردادی؟

داغیلان اوجاقلار یا حسین دئییر!

 

منبع: مجموعه شعر ترکی لاتینی «نجات یولو» از میر جلال (Nicat yolu) ص 42 - 43

کؤچورن: م. قلیزاده علیار

 

 

 

 


مدح امام رضا (ع) - شعر ترکی

 
 مدح امام رضا (ع)

استاد عسگر شاهی اردبیلی

گؤگده آدین تا گلیر تیتره­یر عرش برین

یئرده نه دن بیربئله منزلین اولموش درین

سن ملکوت اهلی­سن ای بشرجان من

یئرده سنی حبس ائدن نفس دیر ای نازنین

نفسی کی ائتدین اسیر عالمه اولدون امیر

مین صفتین اولدو بیر، بیر ثمرین اولدو مین

نفسی مسیح و خلیل، عشق ایله ائتمیش ذلیل

بخش ائله­ییب جبرئیل عاشقه حق الیقین

روح وضو عشق دیر، سرِّمگو عشق دیر

«واعتصموا» عشق دیر، عشق دی حبل المتین

سینه­ده عشق اولماسا، قلبین اولار بوش کاسا

اوندا دوشرسن یاسا، اولسادا فکرین درین

اولماسا عشق ای فلان، حاصلی یوخدوراینان

یوز کره­ ائتسن بیان «نعبدوا» یا «نستعین»

کیم گؤره دلبر قاشین، اگمه یه باش آت داشین

اگمه­دی شیطان باشین اولدو او نادان لعین

باش دئییر آت آدیمی، سالما یادا  یادیمی

روحوون اول خادمی تا اولا روح الامین

 حسن مکمل­دی روح، احمد مرسل­دی روح

یاد ائله اول حضرتی کئچ ملکوت عالمین

ای سنه «شاهی» فدا ایسته­سن عیش و صفا

بسدی فقط مصطفی (ع) بس­دی او نور مبین

عرش وجودوندا غرق، رام رکابینده برق

وصفین ائدر غرب و شرق، مدحین ائدر روم و چین

هردم اوزوندن نقاب آچدی او عالی­جناب

آی دئدی یوز مرحبا، گون دئدی مین آفرین

لشکر اونا «کاف» و «نون»، منبر اونا «حا» و «میم»

شوکت اونا «طا» و «ها»، دولت اونا «یا» و «سین»

سؤز دانیشیب دلربا، وحی ائشیدیب دلپسند

مکتب آچیب دلگشا، دین گتیریب دلنشین

جلوه­سی رضواندادیر، وارثی ایران دا دیر

ملک خراساندادیر، عالمه سالمیش طنین

قدرینه حیران قضا مدحین ائدر مرتضی

شهرتی «موسی الرضا» تربتی مهر جبین

گوزگوسو آهو گؤزو، ضامن آهو اؤزو

قرآنا قارداش سؤزو، دینه دایاق همچنین

یئددی گؤیون سالکی، آلتی مین این مالکی

بئش گؤزه له دین و جان، دؤرد ملکه جان و دین

عشقی وورار قلبه داغ، داغی ائدر قلبی باغ

هم سویو ائیلر چراغ، هم اودو ائیلر سرین

امرینه باغلارمیان «والشجر یسجدان»

قهرینه سؤیلر دومان یا «مطرالمنظرین»

باغ­دا آدین دوتسا باد، باغ اوخویار «و ان یکاد»

کیم اونو دوز ائتسه یاد، اولدو «من المکرمین»

قلب­ده اود گؤزده یاش، سجده یه کی قویدو باش

باشلادی ذکرین یاواش کئچدی سمادن یئیین

درگهووه ای امام، تا دوزه شمع و غلام

هر گئجه اولدوزلارین چرخ ائیله­یردست چین

ای عربین ارشدی، ای عجمین مرشدی

سؤیله دایانسین زامان، سسله دانیشسین زمین

وصفووه عاجزدی دیل، مطلب آغیرمن خجل

مفتعلن مفتعل عهده لیک ائتسین چتین

قلبیمه ای بخش ائده ن نور و ضیا عرش ده ن

سال باشیما حشره جن کؤلگه سین اول دلبرین.