استاد عسگر شاهی اردبیلی
گؤگده آدین تا گلیر تیترهیر عرش برین
یئرده نه دن بیربئله منزلین اولموش درین
سن ملکوت اهلیسن ای بشرجان من
یئرده سنی حبس ائدن نفس دیر ای نازنین
نفسی کی ائتدین اسیر عالمه اولدون امیر
مین صفتین اولدو بیر، بیر ثمرین اولدو مین
نفسی مسیح و خلیل، عشق ایله ائتمیش ذلیل
بخش ائلهییب جبرئیل عاشقه حق الیقین
روح وضو عشق دیر، سرِّمگو عشق دیر
«واعتصموا» عشق دیر، عشق دی حبل المتین
سینهده عشق اولماسا، قلبین اولار بوش کاسا
اوندا دوشرسن یاسا، اولسادا فکرین درین
اولماسا عشق ای فلان، حاصلی یوخدوراینان
یوز کره ائتسن بیان «نعبدوا» یا «نستعین»
کیم گؤره دلبر قاشین، اگمه یه باش آت داشین
اگمهدی شیطان باشین اولدو او نادان لعین
باش دئییر آت آدیمی، سالما یادا یادیمی
روحوون اول خادمی تا اولا روح الامین
حسن مکملدی روح، احمد مرسلدی روح
یاد ائله اول حضرتی کئچ ملکوت عالمین
ای سنه «شاهی» فدا ایستهسن عیش و صفا
بسدی فقط مصطفی (ع) بسدی او نور مبین
عرش وجودوندا غرق، رام رکابینده برق
وصفین ائدر غرب و شرق، مدحین ائدر روم و چین
هردم اوزوندن نقاب آچدی او عالیجناب
آی دئدی یوز مرحبا، گون دئدی مین آفرین
لشکر اونا «کاف» و «نون»، منبر اونا «حا» و «میم»
شوکت اونا «طا» و «ها»، دولت اونا «یا» و «سین»
سؤز دانیشیب دلربا، وحی ائشیدیب دلپسند
مکتب آچیب دلگشا، دین گتیریب دلنشین
جلوهسی رضواندادیر، وارثی ایران دا دیر
ملک خراساندادیر، عالمه سالمیش طنین
قدرینه حیران قضا مدحین ائدر مرتضی
شهرتی «موسی الرضا» تربتی مهر جبین
گوزگوسو آهو گؤزو، ضامن آهو اؤزو
قرآنا قارداش سؤزو، دینه دایاق همچنین
یئددی گؤیون سالکی، آلتی مین این مالکی
بئش گؤزه له دین و جان، دؤرد ملکه جان و دین
عشقی وورار قلبه داغ، داغی ائدر قلبی باغ
هم سویو ائیلر چراغ، هم اودو ائیلر سرین
امرینه باغلارمیان «والشجر یسجدان»
قهرینه سؤیلر دومان یا «مطرالمنظرین»
باغدا آدین دوتسا باد، باغ اوخویار «و ان یکاد»
کیم اونو دوز ائتسه یاد، اولدو «من المکرمین»
قلبده اود گؤزده یاش، سجده یه کی قویدو باش
باشلادی ذکرین یاواش کئچدی سمادن یئیین
درگهووه ای امام، تا دوزه شمع و غلام
هر گئجه اولدوزلارین چرخ ائیلهیردست چین
ای عربین ارشدی، ای عجمین مرشدی
سؤیله دایانسین زامان، سسله دانیشسین زمین
وصفووه عاجزدی دیل، مطلب آغیرمن خجل
مفتعلن مفتعل عهده لیک ائتسین چتین
قلبیمه ای بخش ائده ن نور و ضیا عرش ده ن
سال باشیما حشره جن کؤلگه سین اول دلبرین.
یا حسین!
(نوحه - حضرت زینبین زبانحالی)
کامل سربندی – باکو
بو نه ستمدیر، نه جفا؟ یا حسین!
قانه باتیب کرب و بلا، با حسین!
حدّتایله نعره چکیر شمر دون،
قصدیوه دورموشدور اوتوز مین قشون،
قانایله صحرالر اولوب لالهگون،
حقی دانیب قوم دغا، یا حسین.
اولدو شهید تازه جوان اکبرین،
تشنهلب اوخلاندی علیاصغرین،
گؤرمهدی توی قاسم مهپیکرین،
اولدو قیزیل قانی حنا، یا حسین.
سالدیلار آتدان یئره عباسیوی
قیردیلار اول خنجیر الماسیوی
ایندی یزید بایرام ائدیر یاسیوی
شامدا قوروب بزم صفا، یا حسین.
ظلمی نمایان ائلهدی اهل کین،
اولمادی ال توتماغا یار و معین،
کسدی سنین باشیوی شمر لعین،
ائتمهدی بیر ذره حیا، یا حسین.
نوک جدایه باشیوی تاخدیلار،
زینب نالانی اودا یاخدیلار،
ظلم ایله دینین ائوینی ییخدیلار،
یوخمو مگر روز جزا، یا حسین!
تا نه قدر عؤمرومه بئل باغلارام،
شام و سحر ناله چکیب آغلارام.
«کامل»م هجرینله اورک داغلارام،
راهینه جانیمدی فدا، یا حسین.
منبع: دو هفته نامه «دنیز» شماره 42 مورخ 16 آذر ماه 1392
لیست کل یادداشت های این وبلاگ
