سفارش تبلیغ
صبا

ایکی شاعره بیر شعر!

ایکی شاعره بیر شعر!

اوستاد شامی­دن بیر خاطیره

حمید واحدی

اورمودا منیم یول تاپدیغیم ایلک ادبی انجمن، ارشاد اداره سی­نین شهرچای پارکیندا یئرله­شن دهخدا کتابخانسیندا تشکیل ائتدیگی هفته لیک شعر انجمن ایدی. او زمانلار بیر ایکی ایل ایدی شعر یازیردیم. انجمنه گلن شاعرلردن چوخونون آدی ایندی ده یادیمدادیر، میرحسن سربلند (پولاد)، عبدالحسین شیرپنجه رضایی (تنها)، حاج علی رضایی، محمود صادقپور (شامی)، ... الله تعالی هامیسینا رحمت ائله سین. همچنین عزیز دوستوم کریم گلندام، میر حبیب زمانی، ابراهیم نژادی، بیت­الله جعفری و بیر نئچه گنج شاعر ده اورا گل – گئت ائدیردی.

من بو شاعرلرین آراسیندا ایکی نفر ایله داها آرتیق علاقه ساخلاییردیم؛ شعرلریمی اولارا اوخویور، فکیرلرینی بیلمک ایسته ییردیم. بیری مرحوم «شامی» و ایکینجی ایسه رحمتلیک «تنها» ایدی.

شامی و تنهانین شعرلری او زمانلار منیم اوچون چوخ ماراقلی و تاثیر ائدیجی ایدی. شعرلریمی شامی یه اوخویاردیم او دا ائشیدیب، معین یانلیشلارا دوزه لیش وئرردی. حتی انجمن دن علاوه اونون ایش یئرینه (تعاونی روستایی فروشگاهلاریندا) ده هر دن گئدیب، اونونلا گؤروشوردم، اونا شعر اوخویاردیم، او مرحوم دا دوزلیش دقتله ائشیدیب، نقطه نظرلرینی سؤیلردی. بونا گؤره اونون منیم بوینومدا اوستادلیق و معلیم­لیک حقی وار. او بو گؤروشلرده حتی اؤز شعرلریندن ده منه اوخویاردی. من اونون شعرلریندن چوخونون الیازمالارینی آلیب ساخلامیشام.

او زمانین گنج شاعرلری آراسیندا من شامی یه داها چوخ یاخینلاشدیم، 17 – 18 یاشیم وارایدی؛ اونون دا تخمیناً 35 یاشی. البته شامی­نین شاعر دوستلاری چوخ ایدی، مرحوم عباس بزرگ­امین، کریم گول­اندام، علی شریف دلجویی (آدسیز)، عسگر شاهین پر، حبیب زمانی، عادل پیر شاهوردی (آرمان) و ...

من او زمانلار چوخ فارسجا شعرلر یازیردیم، تورکجه شعرلریم ایسه شامی و تنهانین شعرلری­نین تاثیری آلتیندا ایدی. شامی­یه بیر فارسجا غزل اتحاف ائتمیشدیم، اونو بیه­نیبب، منی آلقیشلادی و بیر - ایکی مصراعسینی دا اصلاح ائتدی. غزل بو ایدی:

دل از زیارت یاران ز شوق لبریز است

شنیدن سخن دوستان دل­انگیز است

کنیم گفته تاریخ گوشواره گوش

که زندگانی اسلاف عبرت­آمیز است

شکوفه­های دلم زردگونه گردد از آن

که در درون دل من همیشه پاییز است

چنان محبت تو گشته با دل من عجین

«شکنجه­های تو بر من محبت­آمیز است»

مجال گفتن حق بر همه میسر نیست

چرا که در پس هر پرده تیغها تیز است

به شهر اورمیه «شامی» است شهریار سخن

اگر چه جایگه شهریار تبریز است.

***

دئدیگیم کی مرحوم عبدالحسین تنها ایله ده سیخ علاقه ده ایدیم، بیر مدت ده بینالارا رنگ وورماق و رئمونت ایشلرینده اونون یانیندا شاگردلیک ائتمیشدیم. تنهانین عالمی شامی ایله فرقلی اولماغینا باخمایاراق، من هر ایکیسیندن تاثیر آلیردیم. شامی­یه یازدیغیم فارسجا غزلین سونوندا «شامی» کلمه­سینی «تنها» کلمه سی­ایله عوضله ییب، مرحوم تنهایا تقدیم ائتدیم! البته بو ایش منیم خاملیغیمدان تؤرنمیشدی! ... نه ایسه، تنها رحمتلیک ده به­یه­ندی و منی تحسین ائتدی. حتی ازبرله میشدی و هر یئره بیرگه گئتسیدیک، منی هوسلندیرمک اوچون، او غزلی اوخویاردی! قضادن بیر گون تنها ایله بیرگه اونون ماتاسکلتینه (موتورسیکلتینه) اوتوروب اورمیه­نین اطرافیندا اولان «بارجوق» کندینه شامی­گیله قوناق گئتدیک. دانیشیقلار آراسیندا شامی بیردن اوزونو تنها مرحوما توتوب: «حمید بیر تزه غزل یازیب!» دئدی. من ایسه بو سؤزو ائشیدنده ائله بیر حالا قالدیم کی، الله بیلیر! ... تنها سؤیله دی: هه، منه ده اوخوموشام، یاخشی دیر!

من بو سؤزدن داها آرتیق آجیناقلی بیر حس کئچیردیم. شامی رحمتلیک اؤز شعرلرینی یاددا ساخلامازدی و دفتر – کاغاذ اوزوندن اوخویاردی، آمما منیم او غزلیمی حفظ ائله میشدی! ... باشلادی شعری اوخوماغا؛ هر بیتی اوخودوقجا من تر تؤکوردوم! اور­کده آللها یالواریردیم که سون بیتینی اوخوماسین!!

شامی سون بیته یاخینلاشدیقجان منیم حالیم ده­ییشیردی ... بئشینجی بیتی اوخودوقدان سونرا، اوزونو تنهایا توتوب دئدی: سونونجو بیتی ده بیلیرسن دا!...

تنها دا باشینی ترپتمکله اونون سؤزونو تایید ائله­دی.... ندنسه، رحمتلیک شامی آلتینجی و سونونجو بیتی اوخومادی و من داها چوخ خجالت چکمکدن خلاص اولدوم .... مجلس قورتاردی.

البته آیدین دیر کی، او مرحوم نه اوچون سونونجو بیتی اوخومادی! ... هر حالدا بو دا بیر درس ایدی من اوچون، ائله او ساعتدن عهد ائله­دیم کی بیر ده بو ایشلردن گؤرمه ییم!

تانری­دان هر ایکی شاعریمیزه رحمت دیله ییرم.

منبع: نشریه «دنیز» شماره 97


مدح امام رضا (ع) - شعر ترکی

 
 مدح امام رضا (ع)

استاد عسگر شاهی اردبیلی

گؤگده آدین تا گلیر تیتره­یر عرش برین

یئرده نه دن بیربئله منزلین اولموش درین

سن ملکوت اهلی­سن ای بشرجان من

یئرده سنی حبس ائدن نفس دیر ای نازنین

نفسی کی ائتدین اسیر عالمه اولدون امیر

مین صفتین اولدو بیر، بیر ثمرین اولدو مین

نفسی مسیح و خلیل، عشق ایله ائتمیش ذلیل

بخش ائله­ییب جبرئیل عاشقه حق الیقین

روح وضو عشق دیر، سرِّمگو عشق دیر

«واعتصموا» عشق دیر، عشق دی حبل المتین

سینه­ده عشق اولماسا، قلبین اولار بوش کاسا

اوندا دوشرسن یاسا، اولسادا فکرین درین

اولماسا عشق ای فلان، حاصلی یوخدوراینان

یوز کره­ ائتسن بیان «نعبدوا» یا «نستعین»

کیم گؤره دلبر قاشین، اگمه یه باش آت داشین

اگمه­دی شیطان باشین اولدو او نادان لعین

باش دئییر آت آدیمی، سالما یادا  یادیمی

روحوون اول خادمی تا اولا روح الامین

 حسن مکمل­دی روح، احمد مرسل­دی روح

یاد ائله اول حضرتی کئچ ملکوت عالمین

ای سنه «شاهی» فدا ایسته­سن عیش و صفا

بسدی فقط مصطفی (ع) بس­دی او نور مبین

عرش وجودوندا غرق، رام رکابینده برق

وصفین ائدر غرب و شرق، مدحین ائدر روم و چین

هردم اوزوندن نقاب آچدی او عالی­جناب

آی دئدی یوز مرحبا، گون دئدی مین آفرین

لشکر اونا «کاف» و «نون»، منبر اونا «حا» و «میم»

شوکت اونا «طا» و «ها»، دولت اونا «یا» و «سین»

سؤز دانیشیب دلربا، وحی ائشیدیب دلپسند

مکتب آچیب دلگشا، دین گتیریب دلنشین

جلوه­سی رضواندادیر، وارثی ایران دا دیر

ملک خراساندادیر، عالمه سالمیش طنین

قدرینه حیران قضا مدحین ائدر مرتضی

شهرتی «موسی الرضا» تربتی مهر جبین

گوزگوسو آهو گؤزو، ضامن آهو اؤزو

قرآنا قارداش سؤزو، دینه دایاق همچنین

یئددی گؤیون سالکی، آلتی مین این مالکی

بئش گؤزه له دین و جان، دؤرد ملکه جان و دین

عشقی وورار قلبه داغ، داغی ائدر قلبی باغ

هم سویو ائیلر چراغ، هم اودو ائیلر سرین

امرینه باغلارمیان «والشجر یسجدان»

قهرینه سؤیلر دومان یا «مطرالمنظرین»

باغ­دا آدین دوتسا باد، باغ اوخویار «و ان یکاد»

کیم اونو دوز ائتسه یاد، اولدو «من المکرمین»

قلب­ده اود گؤزده یاش، سجده یه کی قویدو باش

باشلادی ذکرین یاواش کئچدی سمادن یئیین

درگهووه ای امام، تا دوزه شمع و غلام

هر گئجه اولدوزلارین چرخ ائیله­یردست چین

ای عربین ارشدی، ای عجمین مرشدی

سؤیله دایانسین زامان، سسله دانیشسین زمین

وصفووه عاجزدی دیل، مطلب آغیرمن خجل

مفتعلن مفتعل عهده لیک ائتسین چتین

قلبیمه ای بخش ائده ن نور و ضیا عرش ده ن

سال باشیما حشره جن کؤلگه سین اول دلبرین.